Xorijda sobiq prezident Viktor Yanukovichga yaqin amaldorlarning jami 247,5 million dollarlik mol-mulki xatlandi. Joriy etilgan sanksiyalar natijasida sobiq mansabdorlarning 104 million dollar, 122 million Shveysariya franki, 22 million yevroga teng mablag‘i va aktivlari aniqlangan hamda muzlatib qo‘yilgan. Bu haqda Ukraina bosh prokuraturasi ma’lum qildi, deya xabar beradi “Korrespondent.net”.
Jumladan, sobiq bosh vazir Azarovning Lixtenshteynda 0,5 million dollar, sobiq deputat Ivanyushenkoning Kiprda 258 ming dollar, Latviyada 30,82 million dollar va 1,8 million Shveysariya franki, Shveysariyada esa 72 million franki xatlangan. Sobiq daromadlar va yig‘imlar vaziri Klimenkoning Lixtenshteynda 26,5 million dollari, xavfsizlik kengashi sobiq kotibi Klyuyevning Avstriyada 461 ming yevro, Shveysariyada 13 million frank va Buyuk Britaniyada 675 ming yevro teng mol-mulki muzlatilgan.
Sobiq prezidentning o‘g‘li Aleksandr Yanukovichga qarashli “Mako” kompaniyasining 2,5 million Shveysariya franki miqdoridagi aktivlari ham xatlangani ma’lum qilindi.
Izoh (0)