Hindiston markazidagi Chxattisgarx shtatida hukumat qo‘shinlarining isyonchilar bilan to‘qnashuvi oqibatida kamida to‘rt nafar maochi ayol o‘ldirilgan, jangarilar guruhi yetakchisi esa yaralangan. Bu haqda shtat politsiyasi ma’lum qildi, deya xabar beradi “TASS”.
“Jangarilar guruhini yo‘q qilish bo‘yicha maxsus operatsiya maxsus bo‘linma tomonidan huquq-tartibot idoralari bilan birgalikda maochilar nazorati ostida bo‘lgan Sukma okrugida o‘tkazildi. Qaqshatqich otishmalar davomida kamida to‘rt nafar jangari ayol o‘ldirildi, shuningdek, maochilar yetakchisi yaralandi. Qolgan jangarilar katta miqdorda qurol-aslaha va o‘q-dori zaxiralarini qoldirib, to‘qnashuv joyidan qochgan”, — deya ta’kidladi Chxattisgarx politsiyasining rasmiy vakili.
Politsiya ma’lumotlariga ko‘ra, josuslar yetkazgan axborot yordamida fosh etilgan guruh mintaqadagi bir qancha, xususan, 2013-yil mart oyida Jiram vodiysida uyushtirilgan hujumlarda ishtirok etgan. Mazkur hujum oqibatida 31 kishi, jumladan, Hindiston milliy kongressi partiyasi mintaqaviy bo‘limi rahbarlari halok bo‘lgandi.
Maochi jangarilar (ularni naksalitlar deb ham atashadi) mamlakatning Bixar, Chxattisgarx, Jarkxand, Orissa, Maxarashtra shtatlari changalzorlarida yashiringan bo‘lib, markaziy hukumatga qarshi kurash olib boradi, mansabdorlar va huquq-tartibot idoralari xodimlariga hujum uyushtiradi. Hindiston ichki ishlar vazirligi ma’lumotlariga ko‘ra, keyingi o‘n yil mobaynida maochilar lagerida kamida 40 ming jangari tayyorgarlikdan o‘tgan. 2014-yilning o‘zida 150 ga yaqin kishi ularning qurboni bo‘lgan.
Izoh (0)