AQShda 12 yoshli qiz sayt qahramoni bo‘lgan masxaraboz “buyrug‘i”ga binoan o‘gay onasini o‘ldirdi

AQShning Indiana shtatida o‘gay onasini o‘ldirgan 12 yoshli qiz buni tasavvurdagi masxarabozning buyrug‘iga binoan amalga oshirganini ma’lum qildi. Mazkur jinoyat Elkxart okrugi poytaxti Goshenda iyul oyida sodir bo‘ldi. Ismi oshkor etilmayotgan o‘smir o‘gay onasi Mariya Torresga pichoq urgan va u o‘sha joyning o‘zida hayotdan ko‘z yumgan, deya xabar beradi WSBT 22 telekanali.

So‘roq chog‘ida maktab o‘quvchisi o‘gay onasini o‘ldirishga sirli hodisalar haqidagi Creepypasta sayti qahramoni bo‘lgan to‘qima masxaraboz — Laughing Jack  dav’at etganini bildirgan. 18-noyabr, chorshanba kuni e’lon qilingan sud hujjatlaridan ayon bo‘lishicha, o‘smirda shaxsning ikkiga bo‘linish alomatlari aniqlangan. Tergov davomida qiz qotillikdan bir necha oy oldin otasidan yordam berishini o‘tinib so‘ragani ma’lum bo‘ldi.

Psixiatrlar voyaga yetmagan jinoyatchini jazoga tortish mumkin emasligini bildirib, ruhiy kasalliklar muassasiga davolanish uchun jo‘natishni maslahat bergan. Biroq hozirgacha 16 ta klinika bundan bosh tortgan. Hozir qiz Goshendagi voyaga yetmaganlar tergov izolyatorida saqlanmoqda.