O‘z vaqtida Oq uyda AQSh prezidenti uchun taomlar tayyorlagan Bill Yasses o‘zbek oshpazlari uchun mahorat mashg‘ulotlari o‘tkazmoqda. Bu haqda UZ24 xabar bermoqda.
Taniqli oshpazning mahorat mashg‘ulotlari AQSh Davlat departamentining “Culinary Diplomacy” (“Kulinariya diplomatiyasi”) dasturi doirasida 12—24-noyabr kunlari bo‘lib o‘tadi.
Bill Yasses ma’lum bir taomlar retseptlarini ko‘rsatadi va taom tarixi, qanday mahsulotlardan foydalanish kerakligi, sog‘lom turmush tarzini olib borish shartlari haqida ma’ruzalar o‘qiydi.
“O‘zbekistonga kelganimdan beri ko‘p narsani bilib, o‘rgandim. Palov va lag‘monni juda yoqtirib qoldim. O‘zbekistondagi poliz ekinlari va mevalarning sifatidan juda hayratdaman”, — deya Yassesning so‘zlaridan iqtibos keltirmoqda “Turkiston-press” agentligi.
Oshpaz Toshkent, Urganch, Xiva va Buxoroda mahorat mashg‘ulotlari o‘tkazadi. Xususan, oshpazning ma’ruzalaridan biri 24-noyabr kuni Alisher Navoiy nomli Milliy kutubxonada bo‘lib o‘tadi.
Bill Yasses Oq uyda ishlab, xususan, qandolat buyurtmalarini bajargan. U Buyuk Britaniya qirolichasi Yelizaveta va Rim papasi uchun tortlar tayyorlagan. Yasses kichik Jorj Bush va Barak Obama prezidentligi davrida Oq uyda oshpazlik qilgan.
Izoh (0)