Ўз вақтида Оқ уйда АҚШ президенти учун таомлар тайёрлаган Билл Яссес ўзбек ошпазлари учун маҳорат машғулотлари ўтказмоқда. Бу ҳақда UZ24 хабар бермоқда.
Таниқли ошпазнинг маҳорат машғулотлари АҚШ Давлат департаментининг «Culinary Diplomacy» («Кулинария дипломатияси») дастури доирасида 12—24 ноябрь кунлари бўлиб ўтади.
Билл Яссес маълум бир таомлар рецептларини кўрсатади ва таом тарихи, қандай маҳсулотлардан фойдаланиш кераклиги, соғлом турмуш тарзини олиб бориш шартлари ҳақида маърузалар ўқийди.
«Ўзбекистонга келганимдан бери кўп нарсани билиб, ўргандим. Палов ва лағмонни жуда ёқтириб қолдим. Ўзбекистондаги полиз экинлари ва меваларнинг сифатидан жуда ҳайратдаман», — дея Яссеснинг сўзларидан иқтибос келтирмоқда «Туркистон-пресс» агентлиги.
Ошпаз Тошкент, Урганч, Хива ва Бухорода маҳорат машғулотлари ўтказади. Хусусан, ошпазнинг маърузаларидан бири 24 ноябрь куни Алишер Навоий номли Миллий кутубхонада бўлиб ўтади.
Билл Яссес Оқ уйда ишлаб, хусусан, қандолат буюртмаларини бажарган. У Буюк Британия қироличаси Елизавета ва Рим папаси учун тортлар тайёрлаган. Яссес кичик Жорж Буш ва Барак Обама президентлиги даврида Оқ уйда ошпазлик қилган.
Изоҳ (0)