AQSh, Gruziya, Isroil va Ukraina fazoviy makonga qurollarni birinchi bo‘lib joylashtirmaslik haqidagi BMT rezolyutsiyasiga qarshi ovoz berdi. Bu haqda “Gazeta.ru” xabar bermoqda.
Rezolyutsiya BMT Bosh Assambleyasi e’tiboriga Rossiya tomonidan 30 ga yaqin mamlakatlar, xususan, Belarus, Qozog‘iston, Xitoy, Pokiston va Suriya bilan hammualliflikda havola etilgan bo‘lib, ko‘pchilik ovoz bilan qabul qilingan. Qayd etishlaricha, rezolyutsiyani yoqlab 122 davlat ovoz bergan.
Hujjat “fazoviy makonda qurollanish poygalarining oldini olish bilan bog‘liq vazifalarning muhim va kechiktirib bo‘lmasligini hamda bu maqsadga yetish yo‘lida davlatlarning hissa qo‘shishga tayyorligini tasdiqlaydi”.
O‘z navbatida, AQSh delegatsiyasining ma’lum qilishicha, “mazkur tashabbus ‘kosmik makondagi qurol’ deganda aynan nimalar nazarda tutilishini lozim darajada belgilab bermayapti”.
“Tashabbus faqatgina fazoga joylashtirilgan qurollarga daxldor. Unda sun’iy yo‘ldoshlarga qarshi Yerda joylashgan qurollar haqida so‘z bormaydi, bu hol esa ishonchsizlikni va xato yuz berishi ehtimolini kamaytirmaydi, aksincha, oshiradi”, — deyiladi AQSh tomoni bayonotida.
Izoh (0)