Belarusda 2016-yil iyulida, denominatsiyadan so‘ng muomalaga kiritiladigan yangi milliy pul birliklarida orfografik xato va Belarus Milliy banki (BMB)ning sobiq rahbarlaridan birining imzosi bo‘ladi. Bu haqda BMBning press-relizida axborot berilgan. BMBning izohlashicha, mazkur pul belgilari yangi imlo qoidalari joriy etilguniga qadar chop etilgan.
“Bosilgan vaqti sabab, Belarusning yangi rubllari bir qator o‘ziga xosliklarga edi. Xususan, muomalaga chiqariladigan 2009-yil namunasidagi banknotalarda o‘sha vaqtda Belarus Milliy banki boshqaruvi raisi lavozimida ishlagan Prokopovichning imzosi bor”, — deyiladi axborotda.
Qayd etilishicha, 50 rubl qiymatidagi banknotada “‘pyatsdzesyat’ yozuvi tushirilgan bo‘lib, bu ayni vaqtda amalda bo‘lgan belarus tili imlo qoidalariga zid”. “Bu so‘zning ikkinchi bo‘g‘ini “ya” harfi bilan — ‘pyatsdzyasyat’ ko‘rinishida yozilishi kerak”, — deyiladi bank press-relizida.
Belarus milliy valyutasining denominatsiyasi 2016-yil 1-iyulida amalga oshiriladi. Bu haqdagi tegishli farmon Belarus prezidenti Aleksandr Lukashenko tomonidan imzolangan. Yangi 1 rubl eskisiga nisbatan 10 ming rubl nisbatida almashtiriladi. 2008-yilda tayyorlangan yangi kupyuralar 2000-yil namunasidagi an’anaviy banknotalar o‘rnini egallaydi.
Har ikkala banknota 2016-yil 1-iyulidan 31-dekabriga qadar erkin muomalada bo‘ladi. Eski pul belgilari 2017-yil 1-yanvardan 2019-yil 31-dekabrga qadar BMB, Belarus banklari va bank hisoblanmagan kredit-moliya muassasalarida, 2020-yil 1-yanvardan 2021-yil 31-dekabrgacha esa Milliy bankda cheklovlarsiz yangilariga almashtiriladi.
Belarus tilining yangi imlo qoidalari 2010-yildan amal qilishni boshlagan. U mahalliy hukumat tomonidan 1957-yilda tasdiqlangan imlo qoidalari o‘rniga tatbiq etilgan.
Izoh (0)