АҚШ, Грузия, Исроил ва Украина фазовий маконга қуролларни биринчи бўлиб жойлаштирмаслик ҳақидаги БМТ резолюциясига қарши овоз берди. Бу ҳақда «Газета.ru» хабар бермоқда.
Резолюция БМТ Бош Ассамблеяси эътиборига Россия томонидан 30 га яқин мамлакатлар, хусусан, Беларусь, Қозоғистон, Хитой, Покистон ва Сурия билан ҳаммуаллифликда ҳавола этилган бўлиб, кўпчилик овоз билан қабул қилинган. Қайд этишларича, резолюцияни ёқлаб 122 давлат овоз берган.
Ҳужжат «фазовий маконда қуролланиш пойгаларининг олдини олиш билан боғлиқ вазифаларнинг муҳим ва кечиктириб бўлмаслигини ҳамда бу мақсадга етиш йўлида давлатларнинг ҳисса қўшишга тайёрлигини тасдиқлайди».
Ўз навбатида, АҚШ делегациясининг маълум қилишича, «мазкур ташаббус ‘космик макондаги қурол’ деганда айнан нималар назарда тутилишини лозим даражада белгилаб бермаяпти».
«Ташаббус фақатгина фазога жойлаштирилган қуролларга дахлдор. Унда сунъий йўлдошларга қарши Ерда жойлашган қуроллар ҳақида сўз бормайди, бу ҳол эса ишончсизликни ва хато юз бериши эҳтимолини камайтирмайди, аксинча, оширади», — дейилади АҚШ томони баёнотида.
Изоҳ (0)