Gretsiyada o‘tkazilayotgan JChda o‘zbekistonlik 3 shaxmatchi o‘z yosh toifasida yetakchilik qilyapti

Gretsiyaning Xalkidiki shahrida davom etayotgan shaxmat bo‘yicha 8 yoshdan 18 yoshgacha bo‘lgan sportchilar o‘rtasidagi jahon chempionatida 7-tur partiyalari ortda qoldi. Musobaqa shveysarcha tizimda o‘tkazilayotgan bo‘lib, g‘olib va sovrindorlar 11 ta tur yakuniga ko‘ra aniqlanadi, deb xabar beradi “Olamsport”.

5-noyabrga qadar davom etadigan jahon chempionatida 122 davlatdan 1600 nafardan ziyod shaxmatchilar ishtirok etyapti. Ushbu jahon chempionatida O‘zbekiston sharafini Mamatqul Haylayev va grossmeyster Marat Jumayev murabbiyligidagi 15 nafar yosh shaxmatchi himoya qilyapti.

Ular orasida Bahora Abdusattorova, Nodirbek Abdusattorov, Islombek Sindorovlar mag‘lubiyatsiz odimlayapti va o‘z yosh toifalarida peshqadamlik qilyapti. Kecha, 1-noyabr kuni o‘tkazilgan 7-turda Nodirbek va Islombek raqiblarini mag‘lubiyatga uchratdi. Bahora esa durang natija qayd etdi.

16 yoshli shaxmatchilar guruhida ishtirok etayotgan Abdusattorova 7-turda oq donalarda o‘ynab, reytingda o‘zidan ancha yuqorida turgan bu yosh guruhining birinchi tartib raqamli shaxmatchisi kanadalik Kiyu Jou bilan murosaga keldi. Shunga qaramay, Bahora 6 ochko bilan qo‘shimcha ko‘rsatkichlarga ko‘ra turnir jadvalida peshqadamlikni davom ettiryapti.

12 yoshlilar guruhida o‘z imkoniyatini sinovdan o‘tkazayotgan Nodirbek Abdusattorov esa bu turda oq donalarda harakat qildi va o‘zi singari 5,5 ochkoga ega bo‘lib turgan ozarbayjonlik Mahammad Muradlini mag‘lub etdi. Nodirbek 6,5 ochko bilan o‘z yosh guruhida birinchi o‘rinni egallab turibdi.

10 yoshgacha bo‘lgan shaxmatchilar guruhida qatnashayotgan Javohir Sindorov qora donaдarda moldovalik Arsen Davtyanga yutqazib qo‘ydi. Uning ukasi Islombek Sindorov esa aksincha reytingda o‘zidan yuqorida turgan raqibi qozog‘istonlik Aldiyar Ansatdan ustun keldi. Islombek qo‘shimcha ko‘rsatkichlarga ko‘ra, turnir jadvalida 4-o‘rinni egallab turibdi.

O‘zbekistonlik qolgan shaxmatchilarga to‘xtaladigan bo‘lsak, 7-turda Muzaffarjon Eminjonov, Nodirabegim Parpiyeva, Leyla Kim, Ruxshona Rahimberdiyevalar raqiblarini mag‘lubiyatga uchratdi. Adel Rahmon, Akobirxon Saydaliyev va Maftuna Bobomurodova mag‘lubiyat alamini totib ko‘rdi. Abdumalik Abdusalimov, Shamsiddin Vohidov, Asal Salimova, Yuliya Xegay esa bu safar durang natija qayd etdi.