“Oq-tepa” klubi direktori G‘anisher Shog‘ulomov “Sport” telekanalining “Sokker klub” ko‘rsatuvida kelishilgan o‘yinlar bilan bog‘liq illatlar haqida gapirib o‘tdi, deb xabar beradi “Uff.uz”.
“Kelishilgan o‘yinlar bilan bog‘liq misollarni keltirib o‘tishim mumkin. Ancha vaqt oldin ‘Oq-tepa’ bilan bog‘liq g‘alati natijalar qayd etila boshlandi. Biz tog‘da klubimiz uchun yangi baza qurilishi bilan band edik va hamma o‘yinlarni bevosita kuzata olmas edik. O‘sha vaqtlarda klubimiz o‘z maydonida g‘alaba qozonib, safarda yirik hisobda mag‘lub bo‘laverdi — 0:4, 1:4, 2:4. Agar hisob yirik ko‘rinish olsa, bilingki bu totalizator bilan bog‘liq.
Totalizatorda nafaqat o‘yinlar hisobi, balki sariq va qizil kartochkalar nechta berilishi va hatto nechanchi daqiqada berilishigacha o‘ynaladi. Keyinchalik aniqlashimizcha, o‘sha vaqtlarda klubimizni boshqargan murabbiy Xolboyev totalizatorga aralashib qolgan ekan. Biz uni sharmandasini chiqarib, klubdan haydadik. Ammo hozir o‘sha Xolboyev ‘Lokomotiv’ klubida bemalol ishlab yuribdi. Yana unga ayollar jamoasini topshirib qo‘yishibdi. U futbolchi qizlarga nimani o‘rgatadi? O‘sha qizlar maydonga chiqib, qimor o‘ynaydimi?
Yana Yeraliyev degan futbolchi ham totalizatorga pul tikib yurgan ekan. Uni ham jamoadan sharmanda qilib haydaganmiz.
Futbolimizda nafaqat kelishilgan o‘yinlar, balki hakamlar muammosi ham bor. Shunday hakamlar borki, pul olmagancha qo‘ymaydi. Ba’zilar o‘yinni ‘o‘ldirmasligi’ uchun ham hakamga pul berishga majbur. Bo‘lmasa u butun o‘yin davomida qarshi hakamlik qilib, jamoani ‘sindirishi’ mumkin. Yaxshisi hakamni ‘rozi’ qilib qo‘ygan yaxshi, aks holda jamoa undan ham katta xarajatga tushadi. Futboldan mana shu illatni ham yo‘qotish kerak”, — deydi G‘anisher Shog‘ulomov.
Izoh (0)