Грецияда ўтказилаётган ЖЧда ўзбекистонлик 3 шахматчи ўз ёш тоифасида етакчилик қиляпти

Грециянинг Халкидики шаҳрида давом этаётган шахмат бўйича 8 ёшдан 18 ёшгача бўлган спортчилар ўртасидаги жаҳон чемпионатида 7-тур партиялари ортда қолди. Мусобақа швейцарча тизимда ўтказилаётган бўлиб, ғолиб ва совриндорлар 11 та тур якунига кўра аниқланади, деб хабар беради «Оламспорт».

5 ноябрга қадар давом этадиган жаҳон чемпионатида 122 давлатдан 1600 нафардан зиёд шахматчилар иштирок этяпти. Ушбу жаҳон чемпионатида Ўзбекистон шарафини Маматқул Ҳайлаев ва гроссмейстер Марат Жумаев мураббийлигидаги 15 нафар ёш шахматчи ҳимоя қиляпти.

Улар орасида Баҳора Абдусатторова, Нодирбек Абдусатторов, Исломбек Синдоровлар мағлубиятсиз одимлаяпти ва ўз ёш тоифаларида пешқадамлик қиляпти. Кеча, 1 ноябрь куни ўтказилган 7-турда Нодирбек ва Исломбек рақибларини мағлубиятга учратди. Баҳора эса дуранг натижа қайд этди.

16 ёшли шахматчилар гуруҳида иштирок этаётган Абдусатторова 7-турда оқ доналарда ўйнаб, рейтингда ўзидан анча юқорида турган бу ёш гуруҳининг биринчи тартиб рақамли шахматчиси канадалик Кию Жоу билан муросага келди. Шунга қарамай, Баҳора 6 очко билан қўшимча кўрсаткичларга кўра турнир жадвалида пешқадамликни давом эттиряпти.

12 ёшлилар гуруҳида ўз имкониятини синовдан ўтказаётган Нодирбек Абдусатторов эса бу турда оқ доналарда ҳаракат қилди ва ўзи сингари 5,5 очкога эга бўлиб турган озарбайжонлик Маҳаммад Мурадлини мағлуб этди. Нодирбек 6,5 очко билан ўз ёш гуруҳида биринчи ўринни эгаллаб турибди.

10 ёшгача бўлган шахматчилар гуруҳида қатнашаётган Жавоҳир Синдоров қора доналарда молдовалик Арсен Давтянга ютқазиб қўйди. Унинг укаси Исломбек Синдоров эса аксинча рейтингда ўзидан юқорида турган рақиби қозоғистонлик Алдияр Ансатдан устун келди. Исломбек қўшимча кўрсаткичларга кўра, турнир жадвалида 4-ўринни эгаллаб турибди.

Ўзбекистонлик қолган шахматчиларга тўхталадиган бўлсак, 7-турда Музаффаржон Эминжонов, Нодирабегим Парпиева, Лейла Ким, Рухшона Раҳимбердиевалар рақибларини мағлубиятга учратди. Адель Раҳмон, Акобирхон Сайдалиев ва Мафтуна Бобомуродова мағлубият аламини тотиб кўрди. Абдумалик Абдусалимов, Шамсиддин Воҳидов, Асал Салимова, Юлия Хегай эса бу сафар дуранг натижа қайд этди.