Germaniyalik poygachi, “Formula-1” tasnifidagi avtomobil poygalarida yetti karra jahon chempioni hisoblangan Mixael Shumaxer o‘z hayoti va salomatligi uchun kurashda davom etmoqda. Bu haqda “TASS” xabar bermoqda.
Shumaxer 2013-yil dekabrida Fransiyaning Meribel kurortida chang‘i uchish vaqtida yiqilib, boshidan jiddiy jarohat olgandi. U 2014-yil sentabridan beri Shveysariyadagi Jeneva ko‘li sohilida joylashgan o‘z villasida davolanish kursini o‘tamoqda, uning salomatligi haqidagi ijobiy xabarlar kamdan-kam paydo bo‘lmoqda.
“Mixael — mening yaqin do‘stim, uning oilasi men uchun qadrli. Men tez-tez Mixaelni ko‘rib turaman. U kurashishda davom etmoqda, biz ham uning oilasi bilan birgalikda Mixael uchun kurashishda davom etishimiz kerak”, — dedi Meksika Gran-prisi davomida Xalqaro avtosport federatsiyasi (FIA) prezidenti Jan Todt. Meksika Gran-prisi poygalari Toshkent vaqti bilan 2-noyabrga o‘tar kechasi, 24:00 da boshlanadi.
O‘tgan haftada britaniyalik Lyuis Xemilton uchinchi marta jahon chempioni unvonini qo‘lga kiritdi. Mercedes poygachisining muvaffaqiyatlariga izoh berarakan, Todt britaniyalik poygachi Shumaxerning ko‘rsatkichlarini takrorlashiga hali vaqt borligini aytib o‘tdi. “Mixael erishgan natijalardan faxrlanaman. U qilgan ishlarni ba’zan yodimizdan chiqarishni boshlaymiz”, — dedi FIA rahbari.
Izoh (0)