«Оқ-тепа» клуби директори Ғанишер Шоғуломов «Спорт» телеканалининг «Соккер клуб» кўрсатувида келишилган ўйинлар билан боғлиқ иллатлар ҳақида гапириб ўтди, деб хабар беради «Uff.uz».
«Келишилган ўйинлар билан боғлиқ мисолларни келтириб ўтишим мумкин. Анча вақт олдин ‘Оқ-тепа’ билан боғлиқ ғалати натижалар қайд этила бошланди. Биз тоғда клубимиз учун янги база қурилиши билан банд эдик ва ҳамма ўйинларни бевосита кузата олмас эдик. Ўша вақтларда клубимиз ўз майдонида ғалаба қозониб, сафарда йирик ҳисобда мағлуб бўлаверди — 0:4, 1:4, 2:4. Агар ҳисоб йирик кўриниш олса, билингки бу тотализатор билан боғлиқ.
Тотализаторда нафақат ўйинлар ҳисоби, балки сариқ ва қизил карточкалар нечта берилиши ва ҳатто нечанчи дақиқада берилишигача ўйналади. Кейинчалик аниқлашимизча, ўша вақтларда клубимизни бошқарган мураббий Холбоев тотализаторга аралашиб қолган экан. Биз уни шармандасини чиқариб, клубдан ҳайдадик. Аммо ҳозир ўша Холбоев ‘Локомотив’ клубида бемалол ишлаб юрибди. Яна унга аёллар жамоасини топшириб қўйишибди. У футболчи қизларга нимани ўргатади? Ўша қизлар майдонга чиқиб, қимор ўйнайдими?
Яна Ералиев деган футболчи ҳам тотализаторга пул тикиб юрган экан. Уни ҳам жамоадан шарманда қилиб ҳайдаганмиз.
Футболимизда нафақат келишилган ўйинлар, балки ҳакамлар муаммоси ҳам бор. Шундай ҳакамлар борки, пул олмаганча қўймайди. Баъзилар ўйинни ‘ўлдирмаслиги’ учун ҳам ҳакамга пул беришга мажбур. Бўлмаса у бутун ўйин давомида қарши ҳакамлик қилиб, жамоани ‘синдириши’ мумкин. Яхшиси ҳакамни ‘рози’ қилиб қўйган яхши, акс ҳолда жамоа ундан ҳам катта харажатга тушади. Футболдан мана шу иллатни ҳам йўқотиш керак», — дейди Ғанишер Шоғуломов.
Изоҳ (0)