Sharm-ash-Shayx — Peterburg yo‘nalishi bo‘yicha uchayotganida halokatga uchragan samolyot bortida dastlabki ma’lumotlarga ko‘ra, Ukrainadan ikki nafar, Belarus Respublikasidan bir nafar yo‘lovchi bo‘lgan. Bu haqda Peterburg gubernatori Georgiy Poltavchenko ma’lum qildi, deb xabar beradi “TASS”.
“Rossiyaning Misrdagi elchixonasidan olgan dastlabki ma’lumotlarimizga ko‘ra, bortda bo‘lgan 224 kishidan hech biri tirik qolmagan. Ularning orasida peterburgliklar ko‘pchilikni tashkil qilgan, lekin shimoli-g‘arb hududlarida istiqomat qiluvchilar, bundan tashqari Ukrainaning ikki nafar va Belarusning bir nafar fuqarosi ham bo‘lgan”, — dedi Poltavchenko.
Gubernator “Peterburg qurbon bo‘lganlarning qarindoshlarini bu katta fojia bilan yolg‘iz qoldirmasligi”ni ta’kidlab o‘tdi.
Eslatib o‘tamiz, Misrning Sharm-ash-Shayx aeroporti ma’muriyati samolyotdagi barcha yo‘lovchilar va ekipaj a’zolari Rossiya fuqarolari bo‘lganini ma’lum qilgan edi.
Metrojet (“Kogalimavia”) aviakompaniyasining Sharm-ash-Shayxdan Sankt-Peterburgga uchayotgan Airbus A321 samolyoti 31-oktabr, shanba kuni havoga ko‘tarilganidan 23 daqiqa o‘tib quladi. Layner bortida 224 kishi bo‘lgan.
Airbus A321 ning bo‘laklari Sinay yarimoroli shimolida topildi. Misr ma’muriyatining taxminicha, aviahalokatga texnik nosozliklar sabab bo‘lgan. Aviahalokat sabab Rossiyada 1-noyabr umummilliy motam kuni deb e’lon qilindi.
Izoh (0)