Шарм-аш-Шайх — Петербург йўналиши бўйича учаётганида ҳалокатга учраган самолёт бортида дастлабки маълумотларга кўра, Украинадан икки нафар, Беларусь Республикасидан бир нафар йўловчи бўлган. Бу ҳақда Петербург губернатори Георгий Полтавченко маълум қилди, деб хабар беради «ТАСС».
«Россиянинг Мисрдаги элчихонасидан олган дастлабки маълумотларимизга кўра, бортда бўлган 224 кишидан ҳеч бири тирик қолмаган. Уларнинг орасида петербургликлар кўпчиликни ташкил қилган, лекин шимоли-ғарб ҳудудларида истиқомат қилувчилар, бундан ташқари Украинанинг икки нафар ва Беларуснинг бир нафар фуқароси ҳам бўлган», — деди Полтавченко.
Губернатор «Петербург қурбон бўлганларнинг қариндошларини бу катта фожиа билан ёлғиз қолдирмаслиги»ни таъкидлаб ўтди.
Эслатиб ўтамиз, Мисрнинг Шарм-аш-Шайх аэропорти маъмурияти самолётдаги барча йўловчилар ва экипаж аъзолари Россия фуқаролари бўлганини маълум қилган эди.
Metrojet («Когалимавиа») авиакомпаниясининг Шарм-аш-Шайхдан Санкт-Петербургга учаётган Airbus A321 самолёти 31 октябрь, шанба куни ҳавога кўтарилганидан 23 дақиқа ўтиб қулади. Лайнер бортида 224 киши бўлган.
Airbus A321 нинг бўлаклари Синай яримороли шимолида топилди. Миср маъмуриятининг тахминича, авиаҳалокатга техник носозликлар сабаб бўлган. Авиаҳалокат сабаб Россияда 1 ноябрь умуммиллий мотам куни деб эълон қилинди.
Изоҳ (0)