“Barselona” futbol klubi rahbariyati ishqibozlar tomonidan Kataloniyaning Ispaniyadan mustaqillik uchun kurashi ramzi hisoblangan bayroqlardan foydalanilishi masalasida UEFA ilgari surgan talablarga bo‘ysunish niyatida emas. Bu haqda “Chempionat” xabar bermoqda.
Marca’ning xabar berishicha, Kataloniya klubi ishqibozlar ushbu bayroqlardan foydalangani uchun ikki bor UEFA tomonidan jarimaga tortilgan.
Klubga Chempionlar Ligasi guruh bosqichi doirasidagi “Bayer”ga qarshi o‘yindan so‘ng 40 ming yevro miqdorida jarima solingandi, bungacha ishqibozlar “Yuventus”ga qarshi Yevropa Chempionlar Ligasi (YeChL) finalida muammoga sabab bo‘layotgan bayroqlarni stadionga olib kirgandi.
Shunga qaramay, “Barselona” Belarusning BATE klubiga qarshi YeChL guruh bosqichi uchrashuvi davomida jamoa ishqibozlari tomonidan 20 ming dona bayroqdan foydalanishga ruxsat bermoqchi. Uchrashuv 4-noyabr kuni bo‘lib o‘tadi.
Klubning bu xatti-harakati yangi jarimalarga sabab bo‘ladi, biroq “Kamp Nou” stadionining musobaqalardan chetlatilishi kutilmayapti. Avvalroq Kataloniya klubi rahbarlari 40 ming yevro miqdoridagi jarima masalasini UEFAda va Sport arbitraj sudi (CAS)da muhokama qilishni rejalashtirayotgani ma’lum bo‘lgandi.
Izoh (0)