Yevropa komissiyasi Madridning “Real” futbol klubi bilan bog‘liq ehtimoliy korrupsiya mojarosi yuzasidan tergov-surishtiruv harakatlarini boshladi. Bu haqda “Sports.ru” xabar bermoqda.
Qirollik klubi hozirgi vaqtda 12 million yevroga baholanayotgan yerni bir necha yil avval sotish orqali 22 million yevro ishlab topgan.
“Real” 1998-yili yangi mashg‘ulot markazini qurish maqsadida yarim million yevro evaziga Las-Tablasdagi yerni sotib olgandi. Biroq, qonun bo‘yicha, bu yerga xususiy kompaniya egalik qilishi mumkin emasligi sabab, klub o‘z rejalarini amalga oshira olmagan.
2011-yili “Real” prezidenti Florentino Peres “Santyago Bernabeu” stadionini kengaytirishda ko‘mak berishni so‘rab hukumatga murojaat qilganida, Las-Tablasdagi yer bilan bog‘liq masalani ham ijobiy hal etishga muvaffaq bo‘lgan.
70815 kvadrat metr maydon qaytib shahar mulkiga aylandi, “Real” mazkur savdodan 22 million yevro ishlab oldi. Shunga qaramay, El Pais gazetasi tekshiruvida qayd etilishicha, Las-Tablasdagi bu yer aslida 12 million yevroga baholanmoqda.
Shunday qilib, “Real” noqonuniy ravishda narxni oshirgan va “ortiqcha” 10 million yevroni qo‘lga kiritgan. Agar Yevropa komissiyasi mazkur savdoning noqonuniyligini isbotlasa, “Real” ortiqcha olingan pulni qaytarib berishga majbur bo‘ladi.
Izoh (0)