Бразилияда фирибгарлар полиция терговчисига тезликни оширгани тўғрисида сохта жарима жўнатди

Бразилияда фирибгарликнинг янги тури пайдо бўлди — жиноятчилар автомобиль эгаларига йўл ҳаракати қоидаларини бузганлик учун сохта жарималарни электрон почта орқали жўнатиб, тўловларни ўзлаштирмоқда. O Globo телеканалининг маълум қилишича, Мату-Гроссу штати пойтахти Куяба шаҳрида бир неча шундай ҳолатлар қайд этилган, дея хабар қилади «ТАСС».

Ҳуқуқ-тартибот идоралари полиция терговчиларидан бири сохта жарима олгандан кейингина мазкур жиноий усул тўғрисида хабардор бўлди. Терговчининг ўзи жўнатилган ҳужжатга кўра йўл ҳаракати қоидасини ўзи ҳеч қачон юрмаган кўчада «бузганини» билгач, алдовни пайқаб қолган.

Жиноятчилар жўнатган жарималар миқдори одатда 80 дан 127 реалгачани (20 дан 33 долларгача) ташкил этган ва кўпинча тезликни ошириш ёки хавфсизлик камарини тақмаганлик каби ҳуқуқбузарликларга оид бўлган. Кишилар ҳайдовчилик гувоҳномасидаги балларни йўқотмаслик учун бундай жарималарни тезроқ тўлашга ҳаракат қилган ва найранг қурбонига айланганини пайқамаган.

Фирибгарлар сохта ҳужжатларни тайёрлаш учун ҳайдовчиларнинг шахсий маълумотлари ва гўёки видеокузатув камераларига тушган транспорт воситалари фотосуратларидан фойдаланган. Жиноятчилар қўлига бу маълумотлар қандай тушганини терговчилар аниқлашига тўғри келади.