25-oktabr, yakshanba kuni Gvatemalada prezidentlik saylovlarining ikkinchi turi bo‘lib o‘tadi. Bu haqda “RIA Novosti” xabar bermoqda.
Sentabr oyida bo‘lib o‘tgan birinchi turda nomzodlardan hech biri qonun bo‘yicha talab etiladigan 50% va bir ovozni to‘plolmadi. Natijada ikkinchi turga Jimmi Morales va Sandra Torres o‘tgan. Morales Gvatemalada taniqli komik aktyor va rejissor hisoblanadi. Torres mamlakatning sobiq prezidenti Alvaro Kolomning rafiqasi bo‘lgan va u bilan aynan 2011-yilda, saylovlarda ishtirok etish uchun ajrashgan: Gvatemala qonunlari sobiq davlat rahbarlarining turmush o‘rtoqlariga o‘z nomzodini qo‘yishni man etadi.
Oxirgi jamoat fikrini o‘rganish so‘rovlariga ko‘ra, Morales uchun salkam 66%, Torresga esa 21,5% saylovchilar ovoz berish niyatida. Gvatemaladagi saylovlar sobiq prezident Otto Peres Molinaning janjalli iste’fosi bilan bog‘liq holda kechmoqda: ayni paytda hibsda saqlanayotgan Molina korrupsiya, firibgarlik va jinoiy til biriktirishda ayblanmoqda.
Izoh (0)