25 октябрь, якшанба куни Гватемалада президентлик сайловларининг иккинчи тури бўлиб ўтади. Бу ҳақда «РИА Новости» хабар бермоқда.
Сентябрь ойида бўлиб ўтган биринчи турда номзодлардан ҳеч бири қонун бўйича талаб этиладиган 50% ва бир овозни тўплолмади. Натижада иккинчи турга Жимми Моралес ва Сандра Торрес ўтган. Моралес Гватемалада таниқли комик актёр ва режиссёр ҳисобланади. Торрес мамлакатнинг собиқ президенти Альваро Коломнинг рафиқаси бўлган ва у билан айнан 2011 йилда, сайловларда иштирок этиш учун ажрашган: Гватемала қонунлари собиқ давлат раҳбарларининг турмуш ўртоқларига ўз номзодини қўйишни ман этади.
Охирги жамоат фикрини ўрганиш сўровларига кўра, Моралес учун салкам 66%, Торресга эса 21,5% сайловчилар овоз бериш ниятида. Гватемаладаги сайловлар собиқ президент Отто Перес Молинанинг жанжалли истеъфоси билан боғлиқ ҳолда кечмоқда: айни пайтда ҳибсда сақланаётган Молина коррупция, фирибгарлик ва жиноий тил бириктиришда айбланмоқда.
Изоҳ (0)