Kaliforniya sudi cookies fayllari orqali foydalanuvchilar ortidan kuzatilgani holati sabab Facebook ustidan berilgan da’voni qanoatlantirmadi. Bu haqda “RBK” xabar bermoqda.
Tergov materiallariga ko‘ra, 2010—2011-yillarda ijtimoiy tarmoqqa a’zo bo‘lgan foydalanuvchilar tarmoqdan chiqqanidan so‘ng ular haqidagi axborot cookies orqali to‘planishiga rozi bo‘lmagan. Ya’ni Facebook, foydalanuvchilarning fikricha, foydalanuvchi ijtimoiy tarmoqdan foydalanmayotgan vaqtda u haqidagi axborotni yig‘masligi kerak.
Sudya kompaniya advokatlari keltirgan e’tirozlarni ma’qulladi va da’vogarlar Facebook’ning mazkur harakatlari qandaydir ma’naviy yoki moddiy zarar yetkazganini isbotlab bera olmaganliklarini qayd etib o‘tdi. Foydalanuvchilar 30-oktabrga qadar o‘z da’volarini qayta ko‘rib chiqib, uni sudga topshirishi mumkin.
Qayd etishlaricha, qonun bo‘yicha shaxsiy hayot huquqini buzganlik uchun 100 dollar miqdorida jarima belgilangan. Da’vogarlar esa Facebook’ning harakatlari 150 million foydalanuvchini qamrab olgani, jarimaning umumiy miqdori 15 milliard dollarga yetishi mumkinligini ta’kidlamoqda.
Izoh (0)