Odamlarning Oyga to‘rtinchi qo‘nishi vaqtida amerikalik astronavtlardan biri foydalangan qo‘l soati AQShdagi kimoshdi savdosida 1,6 million dollardan qimmatroqqa sotildi. “TASS” xabariga ko‘ra, 12 daqiqa davom etgan savdolar yakunida floridalik biznesmen soatlarning egasiga aylangan.
Auksionda sotilgan soat 1971-yil 30-iyul kuni Oy sathiga qo‘ngan “Apollon-15” fazoviy kemasi ekipaji komandiri, astronavt Devid Skottning qo‘lida bo‘lgan, soat AQShdagi Bulova kompaniyasi tomonidan ishlab chiqarilgan.
“Oy sathiga qadam qo‘ygan qolgan barcha insonlar NASA tomonidan taqdim etiladigan va AQSh hukumati mulki hisoblanadigan standart Omega xronograflaridan foydalangan”, — deyiladi RRAuction kimoshdi savdo uyi xabarida.
Savdo uyining qayd etishicha, missiya vaqtida Skott Omega siferblatining oynasi singanini ko‘rib, shundan so‘ng shaxsiy soatidan foydalanishga qaror qilgan.
“Apollon-15” missiyasi 1971-yil 26-iyuldan 7-avgustga qadar davom etgan. Missiya doirasida amerikalik astronavtlar Devid Skott va Jeyms Irvin qariyb uch kun Oyda bo‘lgan.
Izoh (0)