Калифорния суди cookies файллари орқали фойдаланувчилар ортидан кузатилгани ҳолати сабаб Facebook устидан берилган даъвони қаноатлантирмади. Бу ҳақда «РБК» хабар бермоқда.
Тергов материалларига кўра, 2010—2011 йилларда ижтимоий тармоққа аъзо бўлган фойдаланувчилар тармоқдан чиққанидан сўнг улар ҳақидаги ахборот cookies орқали тўпланишига рози бўлмаган. Яъни Facebook, фойдаланувчиларнинг фикрича, фойдаланувчи ижтимоий тармоқдан фойдаланмаётган вақтда у ҳақидаги ахборотни йиғмаслиги керак.
Судья компания адвокатлари келтирган эътирозларни маъқуллади ва даъвогарлар Facebook’нинг мазкур ҳаракатлари қандайдир маънавий ёки моддий зарар етказганини исботлаб бера олмаганликларини қайд этиб ўтди. Фойдаланувчилар 30 октябрга қадар ўз даъволарини қайта кўриб чиқиб, уни судга топшириши мумкин.
Қайд этишларича, қонун бўйича шахсий ҳаёт ҳуқуқини бузганлик учун 100 доллар миқдорида жарима белгиланган. Даъвогарлар эса Facebook’нинг ҳаракатлари 150 миллион фойдаланувчини қамраб олгани, жариманинг умумий миқдори 15 миллиард долларга етиши мумкинлигини таъкидламоқда.
Изоҳ (0)