“Fransiya—O‘zbekiston” do‘stlik guruhi raisi “Hazrati Imom” majmuasiga tashrif buyurdi

Joriy yilning 21-oktabr kuni Fransiya parlamentining “Fransiya—O‘zbekiston” do‘stlik guruhi rahbari Filipp Myonye boshchiligidagi delegatsiya, O‘zbekiston Respublikasi Oliy Majlis Qonunchilik palatasi hamdo‘stlik guruhi rahbari T.Eshnazarov hamrohligida “Hazrati Imom” majmuasiga tashrif buyurdi. Bu haqda O‘zbekiston musulmonlari idorasi Xalqaro aloqalar bo‘limi xabar berdi.

Mehmonlarni O‘zbekiston musulmonlari idorasi kutubxonasi Bosh mutaxassisi M.G‘ulomov, O‘zbekiston musulmonlari idorasi Xalqaro aloqalar bo‘limi xodimi I.Ahmedov va Vazirlar mahkamasi huzuridagi Din ishlari bo‘yicha qo‘mita xodimi E.Alimqulovlar kutib oldi.

Tashrifi davomida, mehmonlarga “Hazrati Imom” majmuasi, shuningdek, majmuada qad rostlagan yangi binolar hamda qayta ta’mirlangan me’moriy yodgorliklar tarixi to‘g‘risida ma’lumotlar berildi.

Shuningdek, mehmonlar “Mo‘yi Muborak” madrasa muzeyida joylashgan “Usmon Qur’oni”ni ziyorat qilib, ushbu Qur’on va Diniy idora kutubxonasida saqlanayotgan ko‘plab nodir qo‘lyozmalar haqida ma’lumot oldi.

Tashrif so‘ngida “Fransiya—O‘zbekiston” do‘stlik guruhi rahbari Filipp Myonye boshchiligidagi delegatsiya, O‘zbekiston musulmonlari idorasi xodimlariga samimiy minnatdorchilik bildirdi.