AQShning O‘zbekistondagi elchisi Pamela Spratlen va Toshkent shahar hokimining o‘rinbosari Farida Abdurahimova 21-oktabr, chorshanba kuni poytaxtda AQSh xalqaro taraqqiyot agentligi (USAID) tomonidan moliyalashtirilayotgan ijtimoiy ko‘makka muhtoj ayollar uchun kasbiy to‘garaklar markazi ochilishida ishtirok etdi. Bu haqda UzDaily xabar bermoqda.
Mazkur markaz agentlikning “Istiqbolli avlod” nodavlat-notijorat tashkiloti amalga oshirayotgan “Odam savdosidan jabr ko‘rganlarni reintegratsiya qilish” loyihasi doirasida moliyalashtirildi. Loyiha ijtimoiy himoyaga muhtoj ayollar kasbiy ko‘nikmalar egallashi uchun imkoniyatlarni kengaytirish orqali odam savdosini oldini olishda ko‘mak beradi. Garchi markaz asosan odam savdosidan aziyat chekkanlar uchun mo‘ljallangan bo‘lsa-da, u aholining boshqa yordamga muhtoj qatlamlari uchun ham xizmat qiladi.
Markazdagi to‘garaklarda pazandalik, kompyuter savodxonligi, kosmetologiya va chevarchilik asoslari o‘rgatiladi. To‘garaklar ishi ijtimoiy sherikchilik tamoyillariga asoslanadi: “Istiqbolli avlod” markazga keluvchilar bilan bilimlarini o‘rtoqlashadigan ko‘ngilli ekspertlarni tanlab oladi va xotin-qizlar qo‘mitalari bilan hamkorlikda faoliyat yuritadi.
USAID markazni jihozlash uchun 36 ming dollar ajratdi.
Izoh (0)