Alisher Navoiy nomidagi O‘zbekiston Milliy bog‘ida 20-oktabr, seshanba kuni Markaziy Osiyoda birinchi BMT ekobog‘i yaratildi. “Gazeta.uz”ning xabar berishicha, bog‘ Birlashgan Millatlar Tashkilotining 70 yilligi sharafiga tashkil etilgan.
Ekobog‘ni yaratishda BMT doirasidagi 12 agentlik va dasturni o‘zida birlashtirgan BMTning O‘zbekistondagi vakolatxonasida mehnat qiluvchi 200 dan ortiq xodim qatnashdi, ularga O‘zbekiston Ekologik harakati va Toshkent shahar hokimligi ko‘mak berdi.
O‘zAning yozishicha, ekologik aksiya doirasida 400 tupdan ortiq manzarali daraxt ko‘chati ekildi. Ko‘chatlarning holatini o‘zining agronomlari va atrof-muhit muhofazasi bo‘yicha mutaxassislari bor Milliy bog‘ ma’muriyati nazorat qilib boradi.
O‘zbekiston Ekologik harakati O‘zbekistonda yashil hududlarni kengaytirish, tashlandiq yerlarni obod qilib, ekobog‘lar tashkil etishga alohida e’tibor qaratmoqda. Bugungi kunda mamlakatning turli hududlarida tashkil etilgan, umumiy maydoni qariyb 120 gektardan iborat 25 dan ziyod ekobog‘ga 30 ming mevali va manzarali ko‘chat ekilgan.
Izoh (0)