АҚШнинг Ўзбекистондаги элчиси Памела Спратлен ва Тошкент шаҳар ҳокимининг ўринбосари Фарида Абдураҳимова 21 октябрь, чоршанба куни пойтахтда АҚШ халқаро тараққиёт агентлиги (USAID) томонидан молиялаштирилаётган ижтимоий кўмакка муҳтож аёллар учун касбий тўгараклар маркази очилишида иштирок этди. Бу ҳақда UzDaily хабар бермоқда.
Мазкур марказ агентликнинг «Истиқболли авлод» нодавлат-нотижорат ташкилоти амалга ошираётган «Одам савдосидан жабр кўрганларни реинтеграция қилиш» лойиҳаси доирасида молиялаштирилди. Лойиҳа ижтимоий ҳимояга муҳтож аёллар касбий кўникмалар эгаллаши учун имкониятларни кенгайтириш орқали одам савдосини олдини олишда кўмак беради. Гарчи марказ асосан одам савдосидан азият чекканлар учун мўлжалланган бўлса-да, у аҳолининг бошқа ёрдамга муҳтож қатламлари учун ҳам хизмат қилади.
Марказдаги тўгаракларда пазандалик, компьютер саводхонлиги, косметология ва чеварчилик асослари ўргатилади. Тўгараклар иши ижтимоий шерикчилик тамойилларига асосланади: «Истиқболли авлод» марказга келувчилар билан билимларини ўртоқлашадиган кўнгилли экспертларни танлаб олади ва хотин-қизлар қўмиталари билан ҳамкорликда фаолият юритади.
USAID марказни жиҳозлаш учун 36 минг доллар ажратди.
Изоҳ (0)