“Miss Avstriya” unvoni sohibasi Ena Kadich Bergizel tog‘idagi yugurish mashg‘ulotlari chog‘ida jarlikka tushib ketgan. Bu haqda “Gazeta.ru” xabar bermoqda.
26 yoshli Ena 2013-yili Avstriyada sohibjamollik tojini kiygan edi. 16-oktabr, juma kuni Kadich tog‘ning Insbruk hududidagi qismiga yugurishga otlangan. Oradan biroz vaqt o‘tgach u ukasiga qo‘ng‘iroq qilib, baxtsiz hodisa ro‘y berganini xabar qilgan. Behush va jarohatlangan qizni ikki talaba payqab qolgan — Ena “Ajdarho qoyasi” deb nomlanadigan kuzatuv maydoni yaqinida, o‘ttiz metr pastlikdan topilgan.
Kadich vertolyotda Insbruk kasalxonasiga yetkazildi, biroq 20-oktabr, seshanba kuni tongda hayotdan ko‘z yumdi. Politsiya fojiali hodisa sabablarini o‘rganmoqda.
Izoh (0)