Germaniyaga borish umidida Budapeshtga yo‘l olgan bir necha qochoqni tepgani, yana birini oyog‘idan chalgani uchun N1TV kanalidan bo‘shatilgan va ta’qibga uchragan vengriyalik jurnalist Petra Laslo Rossiyaga ko‘chib o‘tishga tayyorligini bildirdi. Bu haqda u “Izvestiya” gazetasiga bergan intervyusida ma’lum qilgan.
Jurnalist ayolga nisbatan “Bezorilik” moddasi bilan ish ochilgan. Maxsus tayinlangan komissiya Laslo uchun yetti yillik qamoq jazosi so‘ragan, uning o‘zi esa shartli jazo berilishidan umid qilmoqda. “Shuni aniq aytishim mumkinki, hayotim ostin-ustun bo‘lib ketdi. Endi ishga joylashishim va sevimli kasbim bilan shug‘ullanishim dargumon”, — deya hikoya qilgan u.
Petra Facebook bilan ham sudlashish niyatida. Uning aytishicha, ijtimoiy tarmoqda uni jazolashga chaqiruvchi akkauntlar va guruhlar ochilgan, hatto o‘ldirilishi uchun 20 ming dollar mukofot ham va’da qilingan. Tarmoqqa murojaatidan so‘ng esa faqat uni yoqlovchi guruhlar olib tashlangan.
Eslatib o‘tamiz, Laslo bilan bog‘liq hodisa 8-sentabrda Vengriyaning Serbiya bilan chegarasidagi Roske shahrida bo‘lib o‘tgan. Jurnalist ayol oyog‘idan chalgan 52 yoshli suriyalik muhojir Abdul Muhsin keyinchalik Ispaniyaning “Xetafe” futbol klubi murabbiyi etib tayinlandi.
Izoh (0)