Iroqda vabo kasaliga chalinganlar soni 1800 kishidan oshib ketdi. Bu haqda mamlakat sog‘liqni saqlash vazirligi tarqatgan bayonotda ma’lum qilingan, deya xabar beradi “TASS”.
“Bugungi kunga kelib mamlakatda 1809 kishi vabo yuqtirib olgani ma’lum, — deyiladi mazkur bayonotda. — Kasallanganlarning aksariyati Bag‘dodda (559 kishi) va Bobil provinsiyasida (531 kishi) qayd etilgan. 8 kishi xastalik tufayli hayotdan ko‘z yumgan, ularning yarmi poytaxtdan”.
Bag‘doddan 25 kilometr uzoqlikda joylashgan Abu-G‘arib aholi punkti vaboning tarqalish markazi bo‘ldi. Shifokorlarning ta’kidlashicha, ichish yoki ovqat tayyorlash uchun yaroqsiz suvdan foydalanish kasallikka asosiy sabab bo‘lmoqda. Hatto Iroq poytaxtida ham suv bilan ta’minlash tarmog‘i qarovsiz holga kelgan, ko‘pgina aholi punktlarida esa bunday tizim umuman yo‘q.
Vaboga qarshi kurash uchun Iroq hukumati 10 milliard dinor (salkam 8,5 million dollar) ajratdi. Bu mablag‘ga asosan kasallik tarqalishi oldini oluvchi, tarkibida xlor bo‘lgan preparatlar xarid qilinadi.
Izoh (0)