Davlat dumasi deputati Vladimir Putinga Kreml yomon qo‘riqlanayotgani ustidan shikoyat qildi

Rossiya Davlat dumasi deputati Dmitriy Gudkov prezident Vladimir Putinga Federal qo‘riqlash xizmati (FQX) ustidan shikoyat yo‘lladi. Uning fikriga ko‘ra, FQX davlat rahbarini yetarli darajada ishonchli qo‘riqlamayotgan ekan. Bu haqda “RBK” xabar berdi.

Deputat unga Kremldan bir necha yuz metr narida, Katta Moskvoretsk ko‘prigida otasi o‘ldirib ketilgan Janna Nemsovaning advokati Vadim Proxorov murojaat etganini ma’lum qilgan. Advokatning aytishicha, tergov FQXdan jinoyat sodir etilgan payt tasvirga olingan videokuzatuv kameralari yozuvini so‘ragan. Xizmat esa mazkur ko‘prikni kuzatmasligi, kameralar Kreml tashqarisiga emas, ichkariga yo‘naltirilganini ma’lum qilgan.

Proxorov bu javobni FQX tergovga ko‘maklashishni istamayotganligi yoki chindan ham prezident xavfsizligini yetarli darajada ta’minlamayotganligi bilan izohlagan.

“Mazkur obyektda videokameralarning yo‘qligi prezidentni qo‘riqlashda jiddiy kamchiliklar mavjudligini ko‘rsatadi. Bu esa qo‘riqlash xizmatiga yuklangan vazifalar ochiq-oydin bajarilmayotganidan dalolatdir, — deya ta’kidlagan Gudkov. — Terrorchilik xavfi oshganligi, IShIDga qarshi kurash olib borilayotganligini inobatga olib, davlatning birinchi darajali shaxslari bo‘ladigan joylar kuchaytirilgan tartibda qo‘riqlanishi lozim”.

Gudkovning aytishicha, shikoyat to‘g‘ridan-to‘g‘ri prezidentning o‘ziga yo‘llangan, chunki bu birinchi galda uning shaxsiy xavfsizligi masalasidir.