Si Szinpin Xitoyning “jahon jandarmi” bo‘lish istagi yo‘qligini ma’lum qildi

Xitoy yetakchisi Si Szinpinning ma’lum qilishicha, Xitoy “jahon jandarmi” bo‘lishga intilayotgani yo‘q. Bu haqda, “RBK” xabariga ko‘ra, Xitoy rahbari Buyuk Britaniyaga safari arafasida bergan intervyusida aytib o‘tdi.

“Xitoy ‘jahon jandarmi’ bo‘lish niyatida tinchlik va taraqqiyot bo‘yicha harakatlarini kuchaytirayotgani yo‘q, bundan tashqari, Xitoy kimningdir o‘rnini egallash niyatida ham emas. Biz mamlakat muammolari uning o‘z xalqi tomonidan hal qilinishi kerak, deb hisoblaymiz, xalqaro masalalarga esa barcha mamlakatlarning xalqlari o‘rtasidagi maslahatlashuvlar orqali yechim topilishi zarur”, — dedi Szinpin.

Xitoy yetakchisining qayd etishicha, Xitoy boshqa mamlakatlarning ichki ishlariga aralashmaslik tamoyiliga sodiq qoladi hamda xalqaro va mintaqaviy nizolar tinch yo‘l bilan hal etilishi kerak, deb hisoblaydi. “Xitoy mudofaa mazmunidagi siyosatni olib borayotganini, hech qachon gegemonlikka harakat qilmasligi, ekspansiyalarda ishtirok etmasligini bir necha bor ma’lum qilgan”, — dedi Xitoy davlat rahbari.