Ukraina hukumati Odessa ostonasida cho‘kib ketgan kater halokatining ehtimoliy sababini ma’lum qildi

Odessa viloyatida sayohat katerining halokatiga, dastlabki ma’lumotlarga ko‘ra, kemaning ikki barobar ortiqcha yuk olgani sabab bo‘lgan. Bu haqda, “Korrespondent.net” xabariga ko‘ra, infratuzilmalar vaziri o‘rinbosari Yuriy Vaskov ma’lum qildi.

“Ukraina kemachilik registri ma’lumotlariga ko‘ra, kater 12 yo‘lovchi va 3 nafar ekipaj a’zosini olib yurish uchun ruxsatnomaga ega bo‘lgan, biroq bugun kema dengizga 33 yo‘lovchi va 3 nafar ekipaj a’zosi bilan chiqqan, ya’ni, kater ikki marta ko‘p yuk olgan. Dastlabki ma’lumotlarga ko‘ra, aynan shu holat fojiaga sabab bo‘lgan”, — dedi Vaskov.

Eslatib o‘tamiz, 17-oktabr, shanba kuni Odessa viloyati Belgorod-Dnestr tumanidagi Zatoka shaharchasi yaqinida yo‘lovchi kateri ag‘darilib, cho‘kib ketgandi. Hodisa oqibatida 12 kishi halok bo‘lgan.

Shu munosabat bilan Ukrainaning Odessa viloyatida motam e’lon qilingan.