GM Uzbekistan’ning Ravon brendi ostidagi avtomobillari Belarus bozorida 2016-yil birinchi choragidan avval paydo bo‘lmaydi. Bu haqda, Belarusdagi Uz-Daewoo distribyutoriga asoslanib, “Auto.tut.by” xabar bermoqda.
Qayd etishlaricha, Belarusdagi distribyutorning omborida eski Uz-Daewoo brendi ostidagi avtomobillar yetarlicha bor va ular chegirmalar bilan sotiladi.
Ravon avtomobillarining savdosi Rossiyada boshlanganiga qaramay, Belarusdagi distribyutor yangi markaning mamlakat bozoriga olib kirishga daxl qila olmaydi.
Chunki yangi markani yangi bozorga olib kirish rejalari Asakadagi avtozavod rejalari bilan bog‘liq bo‘lib, hozircha GM Uzbekistan uchun eng muhim eksport bozori, bu — Rossiya. “Oddiy qilib aytganda, belaruslar hozircha kutib turishi kerak”, — deyiladi xabarda.
Belarusda sotiladigan Ravon’larning narxlari ham kelasi yili ma’lum bo‘ladi. “Auto.tut.by”ning yozishicha, Ravon — xamyonbop brend va asosan Xitoyda ishlab chiqarilgan modellar bilan raqobatlashadi.
“Katta ehtimol bilan, yangi mashinalarning qiymati Uz-Daewoo brendi ostidagi avtomobillar narxidan ko‘p ham yuqori bo‘lmaydi”, — deya qo‘shimcha qilinadi Belarus internet-nashri xabarida.
Izoh (0)