GM Uzbekistan’нинг Ravon бренди остидаги автомобиллари Беларусь бозорида 2016 йил биринчи чорагидан аввал пайдо бўлмайди. Бу ҳақда, Беларусдаги Uz-Daewoo дистрибьюторига асосланиб, «Auto.tut.by» хабар бермоқда.
Қайд этишларича, Беларусдаги дистрибьюторнинг омборида эски Uz-Daewoo бренди остидаги автомобиллар етарлича бор ва улар чегирмалар билан сотилади.
Ravon автомобилларининг савдоси Россияда бошланганига қарамай, Беларусдаги дистрибьютор янги марканинг мамлакат бозорига олиб киришга дахл қила олмайди.
Чунки янги маркани янги бозорга олиб кириш режалари Асакадаги автозавод режалари билан боғлиқ бўлиб, ҳозирча GM Uzbekistan учун энг муҳим экспорт бозори, бу — Россия. «Оддий қилиб айтганда, беларуслар ҳозирча кутиб туриши керак», — дейилади хабарда.
Беларусда сотиладиган Ravon’ларнинг нархлари ҳам келаси йили маълум бўлади. «Auto.tut.by»нинг ёзишича, Ravon — хамёнбоп бренд ва асосан Хитойда ишлаб чиқарилган моделлар билан рақобатлашади.
«Катта эҳтимол билан, янги машиналарнинг қиймати Uz-Daewoo бренди остидаги автомобиллар нархидан кўп ҳам юқори бўлмайди», — дея қўшимча қилинади Беларусь интернет-нашри хабарида.
Изоҳ (0)