Avstraliyada Malayziya sultoni Ibrohim Ismoil uchun mo‘ljallangan yuk mashinasi ishlab chiqildi. Luxurylaunches xabariga ko‘ra, mashina taqdimoti 15-oktabr, payshanba kuni Brisbendagi King George Square shousida bo‘lib o‘tgan.
Avtomobil Mack Trucks zavodida ishlab chiqarilgan, uning narxi ma’lum qilinmayapti, biroq nashrning taxminicha, uning narxi kompaniyaning eng qimmat — qiymati 480 ming dollarga teng yuk mashinasidan ham qimmat.
Sulton mashinasi soatiga 100 kilometr tezlikda harakatlana oladi, kuzov qizil-ko‘k ranglarga bo‘yalgan va sultonlik ramzlari bilan bezatilgan. Kapot ustiga Ibrohim Ismoil hukmronlik qiluvchi Johor sultonligi ramzi — yo‘lbarsning tilladan ishlangan haykalchasi o‘rnatilgan.
Avtomobil zamonaviy bor texnikasi, televizorga ulangan oltita tashqi kuzatuv kameralari bilan ta’minlangan. Mashina ichida qizil yog‘och va marmardan ishlangan oshxona bor, shuningdek, salonga matrasi tilla ipdan tikilgan ikki qavatli karavot ham o‘rnatilgan.
Mack Trucks kompaniyasi o‘z faoliyatini 1900-yilda boshlagan bo‘lib, yuk mashinalari, avtobuslar va trolleybuslar ishlab chiqarishga ixtisoslashgan. Kompaniya zavodlari AQSh, Avstraliya va Venesuelada joylashgan.
Johor Malay yarim orolining janubida joylashgan bo‘lib, Johor-Baru shahri sultonlik poytaxti hisoblanadi.
Izoh (0)