Toshkentdagi Respublika olimpiya zaxiralari tennis maktabi kortlarida o‘tkazilayotgan “Chellenjer” turkumiga kiruvchi, mukofot jamg‘armasi 125 ming dollardan iborat bo‘lgan turnirning asosiy to‘r bahslari o‘zining hal qiluvchi pallasiga kirdi, deb xabar beradi “Olamsport”.
Musobaqada birinchi raqam ostida tasniflangan o‘zbekistonlik Denis Istomin juftlik bahsida yarim final chiptasini qo‘lga kiritdi. Belaruslik Aleksandr Buriy bilan juftlik hosil qilgan Istomin chorak finalda Xitoy Taypeyi vakili Ti Chen hamda belaruslik Vladimir Ignatik tandemini ortiqcha qiyinchiliksiz 6:1, 6:2 hisobida taslim etdi.
Istomin va Buriyning endigi raqiblari germaniyalik Andre Begemann hamda asli rossiyalik, ayni paytda Yangi Zelandiya sharafini himoya qilayotgan Artyom Sitak bo‘ladi.
Afsuski, Jo‘rabek Karimov va Sanjar Fayziyevdan iborat o‘zbekistonlik tennischilar juftligi o‘zlarining ikkinchi uchrashuvlarida belaruslik Sergey Betov hamda rossiyalik Mixail Yelginga ikki setda ham bir xil 4:6 hisobida mag‘lub bo‘ldi.
Izoh (0)