Qatar poytaxti Doha shahrida yakuniga yetib borayotgan boks bo‘yicha kattalar o‘rtasidagi jahon chempionatida 14-oktabr kuni bir nechta vazn toifasida final janglari bo‘lib o‘tdi. Afsuski, ringga ko‘tarilgan uch nafar o‘zbekistonlik charm qo‘lqop ustasining barchasi raqiblariga imkoniyatni boy berib, jahon chempionatining kumush medali bilan cheklandi, deb xabar beradi “Olamsport”.
Hal qiluvchi final janglarida O‘zbekiston terma jamoasi a’zolaridan Murodjon Ahmadaliyev (-56 kg), Fazliddin G‘oipnazarov (-64) hamda Bektemir Meliqo‘ziyev (-75) mos ravishda Irlandiya, Rossiya va kubalik bokschilarga imkoniyatni boy berdi.
Bugun, 15-oktabr kuni 60 kg vazn toifasidagi o‘zbekistonlik bokschi Elnur Abduraimov Olimpiada yo‘llanmasi uchun ringga ko‘tariladi. U yarim finalda kubalik raqibi Lazaro Alvaresga 0:3 (27:30, 27:30, 27:30) hisobida imkoniyatni boy berib qo‘ygan edi.
Eslatib o‘tamiz, yarim finalda ringga ko‘tarilgan olti nafar o‘zbekistonlik bokschidan uch nafari imkoniyatni boy bergan edi. Shu tariqa, boks bo‘yicha O‘zbekiston terma jamoasi jahon chempionatida 3 ta kumush, 3 ta bronza medaliga ega bo‘ldi.
Izoh (0)