Janubiy Koreyada Yaqin Sharq respirator sindromi koronavirusidan eng so‘nggi bo‘lib davolangan bemor yana kasalxonaga yotqizildi, deya xabar bermoqda “TASS” Koreya OAVlariga tayanib.
Sog‘liqni saqlash va ijtimoiy himoya vazirligi ma’lumotlariga ko‘ra, oktabr boshida kasalxonadan chiqarilgan 35 yoshli erkakning qonida yana Yaqin Sharq respirator sindromi virusi aniqlangach, uni kasalxonaga qaytarishgan.
U bilan shifoxonadan chiqqanidan buyon aloqada bo‘lgan 129 kishi, jumladan, oilasi a’zolari va tibbiy xodimlar karantinga joylashtirilgan.
Koronavirus avji to‘liq tugagani haqida 29-oktabrda e’lon qilinishi rejalashtirilgan edi. Buning uchun so‘nggi bemor tuzalganidan keyin 28 kun o‘tishi kerak.
Janubiy Koreya hududida koronavirus bilan kasallanish bo‘yicha birinchi holat 20-mayda qayd etilgan edi. Bu kasallikdan mamlakatda jami 36 kishi halok bo‘ldi, 186 kishi uni yuqtirib oldi.
Izoh (0)