24-sentabr kuni Makka yaqinidagi Mino vodiysida yuz bergan tiqilinch natijasida halok bo‘lganlar soni deyarli 1400 ga yetdi. Bu haqda Associated Press o‘z hisob-kitoblariga tayanib xabar bermoqda, deb yozadi “RIA Novosti”.
Saudiya Arabistoni hukumati 26-sentabrdan keyin qurbon bo‘lganlar haqida yangi hisobotni chop qilgani yo‘q. Mamlakat sog‘liqni saqlash vazirligi ma’lumotiga ko‘ra, 769 kishi halok bo‘lgan, 863 kishi jabrlangan.
Agentlikning hisob-kitobi joriy yilda haj amallarini bajarish uchun kelgan 18 davlatning rasmiy ma’lumotlariga asoslangan. 2015-yilgi haj tadbiriga 100 dan ortiq davlatdan ziyoratchilar kelgan. Eng ko‘p qurbonlar Erondan: 465 kishi. Misrdan 148 kishi, Indoneziyadan 120 kishi, Nigeriyadan esa 99 kishi halok bo‘lgan.
Hisob-kitoblar uchun yuqoridagi davlatlardan tashqari Pokiston, Hindiston, Mali, Bangladesh, Senegal, Benin, Kamerun, Efiopiya, Marokash, Jazoir, Gana, Chad, Keniya va Turkiyaning hisobotlaridan foydalanilgan.
Eslatib o‘tamiz, tiqilinch haj marosimlaridan biri — shaytonga tosh otish vaqtida ro‘y bergan. Marosim vaqtida 100 minglab odamlar bir joyga to‘planib qolgan va tartibsiz harakat qilgan.
O‘zbekiston Vazirlar Mahkamasi huzuridagi Din ishlari bo‘yicha qo‘mita Axborot xizmati hodisa qurbonlari va jabrlanuvchilari orasida O‘zbekiston fuqarolari yo‘qligini ma’lum qildi.
Keyinroq esa O‘zbekiston Respublikasi Tashqi ishlar vazirligi Mino vodiysidagi fojia oqibatida o‘zbekistonlik ziyoratchilar halok bo‘lmaganini tasdiqladi.
Izoh (0)