24 сентябрь куни Макка яқинидаги Мино водийсида юз берган тиқилинч натижасида ҳалок бўлганлар сони деярли 1400 га етди. Бу ҳақда Associated Press ўз ҳисоб-китобларига таяниб хабар бермоқда, деб ёзади «РИА Новости».
Саудия Арабистони ҳукумати 26 сентябрдан кейин қурбон бўлганлар ҳақида янги ҳисоботни чоп қилгани йўқ. Мамлакат соғлиқни сақлаш вазирлиги маълумотига кўра, 769 киши ҳалок бўлган, 863 киши жабрланган.
Агентликнинг ҳисоб-китоби жорий йилда ҳаж амалларини бажариш учун келган 18 давлатнинг расмий маълумотларига асосланган. 2015 йилги ҳаж тадбирига 100 дан ортиқ давлатдан зиёратчилар келган. Энг кўп қурбонлар Эрондан: 465 киши. Мисрдан 148 киши, Индонезиядан 120 киши, Нигериядан эса 99 киши ҳалок бўлган.
Ҳисоб-китоблар учун юқоридаги давлатлардан ташқари Покистон, Ҳиндистон, Мали, Бангладеш, Сенегал, Бенин, Камерун, Эфиопия, Марокаш, Жазоир, Гана, Чад, Кения ва Туркиянинг ҳисоботларидан фойдаланилган.
Эслатиб ўтамиз, тиқилинч ҳаж маросимларидан бири — шайтонга тош отиш вақтида рўй берган. Маросим вақтида 100 минглаб одамлар бир жойга тўпланиб қолган ва тартибсиз ҳаракат қилган.
Ўзбекистон Вазирлар Маҳкамаси ҳузуридаги Дин ишлари бўйича қўмита Ахборот хизмати ҳодиса қурбонлари ва жабрланувчилари орасида Ўзбекистон фуқаролари йўқлигини маълум қилди.
Кейинроқ эса Ўзбекистон Республикаси Ташқи ишлар вазирлиги Мино водийсидаги фожиа оқибатида ўзбекистонлик зиёратчилар ҳалок бўлмаганини тасдиқлади.
Изоҳ (0)