BMT Yamandagi to‘y marosimiga uyushtirilgan hujum yuzasidan tezkor va xolis tekshiruv o‘tkazishga chaqirdi

BMT bosh kotibining gumanitar masalalar bo‘yicha o‘rinbosari Stiven O’Brayen Yamanning Damar viloyatidagi to‘y marosimiga aviazarbalar berilishi yuzasidan tezkor, shaffof va xolis tekshiruv o‘tkazishga chaqirdi. Bu haqda “RIA Novosti” xabar bermoqda.

“Mojaro ishtirokchilari — davlatlar bo‘ladimi yoki hukumatga qarashli bo‘lmagan qurolli tuzilmalarmi, bundan qat’iy nazar, o‘z xatti-harakatlari uchun javobgarlikni his etishlari lozim”, —deya ta’kidlagan O’Brayen.

Uning aytishicha, Yamandagi urush davomida amalga oshirilayotgan hujumlar qurbonlarining 95 foizi tinch aholi vakillari bo‘lmoqda. Aviazarbalarning yarmidan ziyodi aholi zich joylashgan shahar hududlariga qaratilgan.

Eslatib o‘tamiz, Damar viloyatidagi to‘y marosimiga aviazarbalar berilishi oqibatida halok bo‘lganlar soni 51 nafarga yetgan. OAV ma’lumotlariga ko‘ra, bu hujumni arab mamlakatlari koalitsiyasi amalga oshirgan, biroq koalitsiya vakili Ahmad al-Assiriy aviatsiya Damarda amaliyot o‘tkazmaganligini ta’kidlamoqda.