Xitoyning Chjenchjou shahrilik biznesmen bayram kunlarida sotuv rejasini bajarmagan xodimlari uchun antiqa jazo o‘ylab topdi: ularni shaharning markaziy ko‘chalarida emaklashga majbur qildi. Bu haqda “Nur.kz” xabar bermoqda.
Yuzlab shaharliklar ko‘z o‘ngida ro‘y bergan ko‘l bo‘yidagi bunday tahqirlovchi “sayr” fotosuratlari Weibo ( Twitter’ning Xitoydagi ko‘rinishi) sahifalarida paydo bo‘ldi. Hodisa 2-oktabrda yuz bergani aytilmoqda.
Suratlarga tadbirkor kompaniya xodimlarini bayram kunlariga rejalashtirilgan sotuv rejasini bajarmaganliklari uchun jazolagani to‘g‘risidagi izohlar ilova qilingan.
Guvohlarning ta’kidlashicha, deyarli barcha xodimlarning kiyimlari nobop ko‘rinishga kelgan va yirtilgan. Xodimlardan biri o‘zini tutib turolmay, yo‘l chetida yig‘lab yuborgan.
Suratlarning paydo bo‘lishi Xitoy OAVlari va ijtimoiy tarmoqlarida o‘quvchilar va foydalanuvchilarning g‘azabiga sabab bo‘ldi. Biroq xodimlarini bunday usul bilan kamsitgan biznesmen va kompaniya nomi hozircha aniqlanmagan.
Izoh (0)