Toshkentdagi “O‘zbekiston” sport saroyida dzyudo bo‘yicha o‘tkazilayotgan Gran-Pri musobaqasida vazni 73 kilogrammgacha bo‘lgan polvonlar bellashuvida g‘olib va sovrindorlar nomi ma’lum bo‘ldi, deya xabar bermoqda O‘zbekiston Milliy olimpiya qo‘mitasi rasmiy sayti.
Ushbu vazn toifasida oltin medalni o‘zbekistonlik Mirali Sharipov qo‘lga kiritdi. O‘zbekiston terma jamoasining yetakchi a’zolaridan biri hisoblangan sportchi saralash bellashuvlarida Belarus, Janubiy Koreya va Germaniya vakillarini, yarim finalda KXDRlik sportchini mag‘lub etib, finalda esa portugaliyalik Nuno Saraivani yengdi.
Mazkur vazn toifasida bellashuvlarga kirishgan yana bir o‘zbekistonlik G‘iyosjon Boboyev esa saralash bosqichida Serbiya, Xitoy va BAA vakillaridan ustun keldi va yarim finalda portugaliyalik Nuno Saraivaga imkoniyatni boy berdi. Uchinchi o‘rin uchun kechgan bahsda germaniyalik Igor Vantkeni yenggan G‘iyosjon Boboyev bronza medali sohibi bo‘ldi.
Hozirda O‘zbekiston terma jamoasi bitta oltin, bitta kumush va ikkita bronza medali bilan umumjamoa hisobida Yaponiyadan so‘ng ikkinchi o‘rinda bormoqda.
Izoh (0)