O‘zbekiston Futbol Federatsiyasi prezidenti Mirabror Usmonov O‘zbekiston klublari o‘rtasidagi musobaqalar reglamentiga kelishilgan o‘yinlarga qarshi kurashish bo‘yicha alohida band kiritishni taklif qildi. Bu haqda O‘FF matbuot xizmati xabar bermoqda.
“Federatsiya rahbari O‘zbekiston klublari o‘rtasidagi musobaqalar reglamentiga kelishilgan o‘yinlarga qarshi kurashish bo‘yicha alohida band kiritish va umuman uni 2016-yildan boshlab qaytadan tuzib chiqish tashabbusi bilan chiqib, bu borada O‘FF Bosh kotibi Sardor Rahmatullayev va PFL direktori Farhod Magametovga topshiriq berdi”, — deyiladi O‘FF matbuot xizmati xabarida.
“Reglamentda ayrim masalalar ochiq qolib ketgan va biz yuzaga kelgan shu vaziyatlarni inobatga olib, bugun biz gapirayotgan mavzuga aloqadorligi aniqlangan shaxslarga qo‘llaniladigan jazo choralarini kuchaytirishimiz kerak. Kerak bo‘lsa, klubni quyi ligaga tushirib yuborish, ochkolarini olib tashlash, unvonlardan mahrum etish masalasini ham kiritishimiz kerak”, — deydi Usmonov.
Eslatib o‘tamiz, futbol bo‘yicha O‘zbekiston Oliy Ligasi doirasida 25-sentabr kuni o‘tkazilgan “Paxtakor” — “Metallurg” (3:2) uchrashuvining so‘nggi daqiqalari O‘FF tomonidan sport prinsiplari va etikasiga zid deb topilib, “Metallurg” bosh murabbiyi Rustam Mirsodiqovning litsenziyasi 2015-yil oxiriga qadar bekor qilingani futbol jamoatchiligi o‘rtasida shov-shuvlarga sabab bo‘lgandi.
O‘FF prezidenti “Paxtakor” — “Metallurg” uchrashuvida ro‘y bergan voqealarni “katta sharmandalik” deb atab, 2015-yilgi mavsum yakunlariga ko‘ra “Paxtakor” futbol klubi qattiq jazolanishi, kelishilgan o‘yinlarni tashkil etishda gumon qilinayotgan futbol klublarining “katta rahbarlari”ga nisbatan choralar ko‘rilishiga va’da berdi.
Izoh (0)