Boris Nemsovning o‘ldirilishi ishi bo‘yicha hibsga olingan Shadid Gubashev avval iqror bo‘lib bergan ko‘rsatmalarini rad etdi. Bu haqda Meduza xabar bermoqda.
“Rosbalt”ning o‘z manbasiga asoslanib xabar berishicha, siyosiy arbobning o‘ldirishi bo‘yicha jinoyat ishida aybini tan olgan birorta ham ayblanuvchi qolmadi. Avvalroq Zaur Dadayev va Anzor Gubashev ham o‘z ko‘rsatmalarini inkor etgandi, hibsga olinganlarning qolganlari esa dastlabki jarayondayoq aybini tan olmagandi.
Vaziyatdan boxabar manbaning “Rosbalt”ga ma’lum qilishicha, shu haftaga qadar Rossiya Tergov qo‘mitasi xodimlari aynan Shadid Gubashevdan “katta umid” qilayotgandi. U iqror bo‘lib bergan ko‘rsatmalari tergovchilarning qo‘lida bo‘lgan jinoyat ishining yagona qatnashchisi bo‘lib turgan edi.
Rossiyalik siyosiy arbob Boris Nemsov 27-fevral kuni yarim tunda Moskva shahri markazida o‘ldirib ketilgan. Mazkur ish bo‘yicha besh kishi — Zaur Dadayev, Anzor Gubashev, Shadid Gubashev, Tamerlan Eskerxanov va Hamzat Baxayev hibsga olingan. Yana bir gumonlanuvchi — Beslan Shavanov esa hibsga olishga urinish vaqtida o‘zini granata vositasida portlatib yuborgan.
Izoh (0)