Rossiyaning Birinchi kanali qamoqqa olingan Komi rahbari kabinetidagi Putin va Medvedev suratlarini yashirdi

Rossiyaning Birinchi kanalida 25-sentabr, juma kuni “Inson va qonun” dasturi orqali firibgarlik va uyushgan jinoiy guruh tuzishda ayblanayotgan Komi respublikasi rahbari Vyacheslav Gayzer to‘g‘risidagi syujet namoyish etildi. Bu haqda “TJ” xabar bermoqda.

Gayzerning ish kabinetidagi tintuvlar aks etgan syujetda pullar to‘la seyf, qimmatbaho buyumlar va soatlar joylashgan shkaf, shuningdek, ikkita samolyot xaridi uchun hujjatlar ko‘rsatilgan. Biroq Rossiya prezidenti va bosh vazirining devorda osilgan suratlari tanib bo‘lmaydigan darajada chaplashtirib qo‘yilgan.

Bunga ijtimoiy tarmoq foydalanuvchilari darrov e’tibor qaratdi. Jumladan, dasturchi Roman Bader Facebook’dagi sahifasida ta’kidlashicha, “jinoyatchi ishonuvchan tomoshabinda davlatning birinchi shaxslari bilan yakdil tasavvur qoldirmasligi uchun” Birinchi kanal Putin va Medvedevning portretlarini yashirgan.

Eslatib o‘tamiz, Moskvaning Basmanniy sudi firibgarlik va jinoiy guruh tuzishda ayblanayotgan Komi Respublikasi rahbari Vyacheslav Gayzerni 18 noyabrga qadar qamoqqa olishga sanksiya bergan.