Россиянинг Биринчи каналида 25 сентябрь, жума куни «Инсон ва қонун» дастури орқали фирибгарлик ва уюшган жиноий гуруҳ тузишда айбланаётган Коми республикаси раҳбари Вячеслав Гайзер тўғрисидаги сюжет намойиш этилди. Бу ҳақда «TJ» хабар бермоқда.
Гайзернинг иш кабинетидаги тинтувлар акс этган сюжетда пуллар тўла сейф, қимматбаҳо буюмлар ва соатлар жойлашган шкаф, шунингдек, иккита самолёт хариди учун ҳужжатлар кўрсатилган. Бироқ Россия президенти ва бош вазирининг деворда осилган суратлари таниб бўлмайдиган даражада чаплаштириб қўйилган.
Бунга ижтимоий тармоқ фойдаланувчилари дарров эътибор қаратди. Жумладан, дастурчи Роман Бадер Facebook’даги саҳифасида таъкидлашича, «жиноятчи ишонувчан томошабинда давлатнинг биринчи шахслари билан якдил тасаввур қолдирмаслиги учун» Биринчи канал Путин ва Медведевнинг портретларини яширган.
Эслатиб ўтамиз, Москванинг Басманний суди фирибгарлик ва жиноий гуруҳ тузишда айбланаётган Коми Республикаси раҳбари Вячеслав Гайзерни 18 ноябрга қадар қамоққа олишга санкция берган.
Изоҳ (0)