AQSh va Markaziy Osiyoning besh mamlakati — Qozog‘iston, Qirg‘iziston, Tojikiston, Turkmaniston va O‘zbekiston mintaqaviy masalalarni muhokama qilish bo‘yicha yangi muloqot formatini o‘rnatdi. Bu haqda, 26-sentabr kuni Nyu-Yorkda AQSh davlat kotibi Jon Kerrining mazkur besh mamlakat tashqi ishlar vazirlari bilan bo‘lib o‘tgan uchrashuvi yakunlari bo‘yicha, AQSh Davlat departamenti matbuot xizmati rahbari Jon Kirbi ma’lum qildi, deya xabar bermoqda “TASS”.
“AQSh davlat kotibi va Markaziy Osiyo (C5) mamlakatlari tashqi ishlar vazirlari AQSh va mintaqa mamlakatlari xavfsizlik va iqtisodiy taraqqiyot sohasidagi yangi chaqiruvlarga birgalikda qanday munosabat bildirish mumkinligini muhokama qilishdi”, — deydi Jon Kirbi. Muhokamalar davomida Afg‘onistondagi vaziyat va uning Markaziy Osiyodagi barqarorlikka ta’siri masalalari ham ko‘rib chiqildi.
Shundan so‘ng uchrashuv qatnashchilari mintaqaning mazkur mamlakatlari o‘rtasidagi o‘zaro hamda Osiyo va Yevropaning qolgan mamlakatlari bilan iqtisodiy aloqalarning yaxshilanuvi tinch va barqaror taraqqiyotga ko‘mak berishi haqida fikr almashgan. “Davlat kotibi va tashqi ishlar vazirlari amaldagi ikki tomonlama muloqotlarga qo‘shimcha sifatida yaqin vaqt ichida C5+1 formatida yangi muhokamalarni tashkil etish imkoniyatlarini ko‘rib chiqishga kelishib oldi”, — deydi Davlat departamenti matbuot xizmati rahbari.
Izoh (0)