Yaponiya parlamentining yuqori palatasi 19-sentabr, shanba kuni milliy qurolli kuchlarga mamlakat tashqarisidagi harbiy harakatlarda ishtirok etishga ruxsat beruvchi qonun loyihasini ma’qulladi. Reuters’ning yozishicha, qonun iyul oyida quyi palata tomonidan qabul qilingan edi, shu sababli ushbu qonun to‘laqonli qabul qilindi, deyish mumkin.
Yaponiya bosh vaziri Sindzo Abening aniqlik kiritishicha, parlament tomonidan qabul qilingan bu qonun “odamlarning tinch hayot tarzini himoya qilish, shuningdek, qurolli nizo oldini olish uchun zarurdir”. U “mazkur hujjatning ma’no-mazmunini jamiyatga tushuntirib berish uchun tinmay harakat qilishi”ni aytib o‘tdi.
Hujjatga muvofiq, Mudofaa kuchlari (Yaponiya armiyasi), Yaponiyaning o‘zi hujumga uchramayotgan bo‘lsa-da, do‘st mamlakatlarni jamoa bo‘lib mudofaa qilishda qatnashishi mumkin, ayni vaqtda, Yaponiya armiyasining bu harakatlarga qo‘shilishi uchun bir qator shartlar bajarilishi kerak.
Xususan, qonunga ko‘ra, Yaponiya armiyasi kuchlaridan foydalanish uchun mazkur nizoni hal qilishning qurolli kuch ishlatishdan boshqa muqobil yo‘li qolmagan bo‘lishi kerak. Kuch cheklangan miqdorda ishlatiladi, o‘z navbatida, mazkur nizo Yaponiyaning mavjud bo‘lishi hamda uning xalqi hayoti va ozodligiga tahdid solishi kerak.
Qonunning qabul qilinayotgan vaqtda parlament binosi oldida ommaviy norozilik namoyishlari davom etayotgan edi. Namoyishchilarning fikricha, bu qonun mamlakatning tinchlikparvar (patsifistik) konstitutsiyasiga zid va 70 yillik tinch hayotdan so‘ng yangi harbiy harakatlarni qo‘zg‘ashi mumkin.
Yaponiya Ikkinchi jahon urushida mag‘lubiyatga uchraganidan so‘ng, AQShning bosimi ostida patsifistik konstitutsiya qabul qilishga majbur bo‘lgandi, unga muvofiq Yaponiya urushdan xalqaro bahslarni tartibga solish vositasi sifatida voz kechgandi.
Biroq so‘nggi vaqtlarda, ayniqsa, Xitoy tomonidan o‘sib borayotgan tahdid sabab, Yaponiya konstitutsiyaning tinchlikparvarlik yo‘nalishini qayta ko‘rib chiqishni boshladi.
Izoh (0)